“Hiki ni kitabu kinachowasilisha kwa uwazi na kwa ufupi maarifa ya msingi ambayo kila kijana anapaswa kuyafahamu ili ajipange kimkakati kwa ajili ya maisha yake. Sura ya 12 inayohusu fedha ni ya kipekee kwa mafundisho yake. Vijana wanapaswa kujifunza tangu mwanzo kutambua tofauti kati ya fedha na utajiri, ili waweze kuvunja minyororo ya umaskini na hali ya kunyimwa fursa za maendeleo.”

“Sasa Ninajua ni kitabu kinachotia moyo na kutoa mwongozo wa vitendo kwa kufungamanisha hekima ya kudumu na changamoto za maisha ya leo. Kwa kuchanganya mafundisho ya wanafalsafa wa kale na fikra za viongozi wa kisasa wa Afrika, mwandishi amewasilisha mawazo ishirini na moja yenye maana na uwezo wa kubadili maisha.

Kitabu hiki kinawahimiza wasomaji kufikiri kwa kujitegemea, kuishi kwa kusudi na kujenga ustahimilivu, huku kikitoa mafunzo ya vitendo kuhusu matumizi bora ya muda, kufanya maamuzi sahihi na kukuza uwezo binafsi. Kwangu, hiki ni kitabu ambacho ni rafiki wa karibu katika safari ya maisha, kwa kuwa kinampa msomaji uwazi wa fikra, mwelekeo wenye kusudi na nguvu ya kukabiliana na changamoto za maisha.”

“Afrika ni bara lenye idadi kubwa ya vijana. Hata hivyo, hatua nyingi za kisera zilizochukuliwa hadi sasa hazijafanikiwa kuleta mabadiliko makubwa katika maisha ya vijana wengi; wanawake kwa wanaume. Ukweli usiopingika ni kwamba, vijana wa Afrika bado wanasalia pembezoni mwa ushiriki wa kisiasa na fursa za kiuchumi. Kutokana na hali hiyo, vijana wengi waliokata tamaa hujikuta wakigeukia njia za vurugu kama suluhisho la changamoto zinazowakabili.

Kitabu hiki kimekuja wakati mwafaka, kikitoa tafakuri za kifalsafa kuhusu nafasi na changamoto za vijana katika jamii ya leo. Jambo la pekee ni kwamba, kinawafundisha na kuwakumbusha vijana namna ya kubadili kipato kuwa utajiri endelevu. Kwa hakika, hiki ni kitabu cha mwongozo wa vitendo kinachowawezesha vijana kujitambua, kukuza uwezo wao na kufikia utimilifu wa maisha yao.”

“Sasa Ninajua ni kitabu chenye tafakuri nzito, kinachomwelekeza msomaji katika safari ya kujitambua, kugundua kusudi la maisha na kuishi kwa uhalisia. Nguvu kubwa ya kitabu hiki imo katika uwezo wake wa kuifanya falsafa iwe rahisi kueleweka na yenye umuhimu katika maisha ya kila siku. Sura ya Jitambue Mwenyewe ni somo linalopaswa kumfikia kila mtu anayejihisi kupotea katikati ya kelele na misukosuko ya maisha ya kisasa au anayetamani kuelewa kwa kina kusudi la maisha yake. Kwa namna ya pekee, kitabu hiki kinafaa kwa vijana, wataalamu wa fani mbalimbali na watu wote wanaopenda kujifunza katika maisha yao, wanaotafuta uwazi wa fikra katikati ya ulimwengu uliojaa vurugu na vishawishi.

Sasa Ninajua kinakuwa rafiki wa kudumu kwa kila aliye tayari kuandika upya simulizi la maisha yake na kuishi kwa uhalisia. Ninakipendekeza kwa moyo wote kwa kila anayetamani kuitikia wito wa 'Jitambue Mwenyewe' na kujenga maisha yenye maana, kusudi na athari chanya kwa wengine.”

“Sasa Ninajua ni kitabu cha falsafa kilichoandikwa na Frateri Aman Lyimo. Kitabu hiki kinawasilisha mawazo ishirini na moja ya kifalsafa kwa ajili ya maisha. Kwa namna ya pekee, mwandishi ameweza kukusanya, kuoanisha na kuendeleza kwa ustadi fikra makini na zenye nguvu kutoka kwa wanafalsafa mashuhuri pamoja na viongozi wanafikra wa Afrika. Kupitia uchambuzi wake wa kina wa kazi zao, ametoa mchango muhimu wenye ujumbe wa msingi, wenye nguvu, unaochochea tafakuri na unaojenga maarifa kwa ajili ya ukuaji wa kifikra katika jamii kwa wanaopenda hekima na wasomaji kwa ujumla.

Ninapendekeza kila mtu akisome kitabu hiki kwa sababu kitamhamasisha na kumwezesha kufikiri kwa kina, kujitegemea na kujenga uwezo wa kujitawala, hasa anapokabiliwa na changamoto, upinzani au ukosoaji usiotarajiwa.”

“Sasa Ninajua: Kutoka Kutokuelewa hadi Uelewa kinatoa mwongozo wa kiakili, kutoka katika hali ya kutokuwa na uhakika hadi kwenye ufahamu na mtazamo mpana wa maisha kupitia falsafa. Kimeandikwa kwa ustadi na kina, ili kutoa mwelekeo sahihi wa kudumu kwa akili inayotafakari na yenye kiu ya kutaka kujua.”